香港樓市好危險

呢個世界，從來都唔會走中間，走中間的無任何著數，所以，樓市和股市，只有很瘋狂和很悲哀，當大跌市時，政府點出招鼓勵市民買樓，都唔敢買。同樣地，辣照點重，樓市都會照升，再升，升到某一刻就會急跌了。我預計，2017將會好危險，不過，食粥食飯係整定的，無論幾危險，都總會有人沖入去，買128呎的豪宅。

換人民幣 買中國股市好時機

深港通終於開通，人民幣跌穿6.96，如果之前無在高位賣出，現在繼續揸住也無妨，短期相信會繼續跌，長期黎講會很好的。如果跌到與港元1兌1，係值得買既，如果低到HKD94=RMB100，嘩！呢個係超值，而呢個機會，我相信係有既，但到時大家還敢買嗎？

中國政府辛辛苦苦攪入SDR，點解會讓人民幣係咁跌呢？我相信中國政府從滬股通得到很多經驗。當時人民幣貴，股票係咁升，咁高的價格同匯率，再加上不成熟的處理方式，世界很難會同你玩。經歷過股災，人民幣入埋SDR，想其他國家用人民幣為儲備，成為國際通用貨幣，現在的匯率一定要任它跌，跌到夠吸引，甚至超值，資金自然會買。

除了匯率跌，仲有咩方式去引你呢？今次中國政府學聰明了，同樣用番股票。深港通點解在人民幣一直跌的時候推出？你看看，中國股市呢排卻一直升，與人民幣剛好相反，不斷說資金外流，卻一直有人買股票，原因就是要引資金買股票，不斷俾個更低成本的匯率你換人民幣，換左人民幣再引你投資股票，所以我相信中國股市短期會一直升，呢個係最好引你的方法，你唔買就越升越有！所以，以低價換人民幣，再買股票，到時兩邊一齊賺！中國若能成為大國，與美國、歐盟同級的話，匯率何止HKD130=RMB100呢？人民幣同美金1:1就差不多！

以上的論點，基於一個基礎，就係要相信中國會更好！同樣在97時，你相信哪方面？你選對了嗎？

解決香港住宿問題

上星期，港府突然劃一加15%稅，樓市即時靜了下來，投資者會睇定D，用家計完數，只要覺得將來會升過15%，都會入市，理由係始終要用，地產佬呢句謊話，將來會害死好多人，而且，呢15%大家都知不會永遠，地產商絕對可以等到政府收手，甚至幫業主出埋15%，死的只會是二手樓，唔係地產商，因為二手樓業主俾唔起15%。各大小傳媒、學者討論住屋、劏房問題，都講左N年，奈何樓價卻越升，港人住的環境越來越差，不論是劏房戶定私樓戶，普通人或基層人均住的面積，降到約40幾平方呎，呢個問題，大家都知，政府都好清楚，大家都知香港人住宿好無尊嚴，一家四口住在110呎的地方，真係好慘！但政府的辣招，出左好多次，但總是解決不了問題。因此，今日我想攤開黎講。

政府、地產經常都講，只要增加土地供應，樓價自然會下跌，但我卻說，呢個理論到今天已不成立了！點解？因為現在的地產商太有錢了，唔同10幾20年前。香港地貴，眾人皆知，政府一年可以拿幾多塊地出黎，你出20幅，各大小地產商就買哂你20幅，你出100幅，佢有錢買哂你100幅，而且，現在唔單止係香港地產商買，中國地產商更厲害，我相信，他們富有的程度，是可以買起成個香港，而且有些還有阿爺係背後支持，無限子彈的！最近香港頻頻出現新地王，就係呢個原因。你話佢咁高價搶番黎，只要佢控制住成個價，日後貴一貴都有人買，遲D咪80呎一個單位，只有睡床，廚房都唔煮食，不如cut埋佢，設個公共廚房，有個共用空間，沙發、餐台大家share，再計番入你的實用面積，地產商再同你講增進鄰里關係，有新賣點啦！

要解決香港樓市問題，修改法例係一個非常好的方法，可參考鄰埠澳門的造法。法例規定房間最少9m2，主人房12m2，呢D就係讓市民住得有尊嚴的造法，或者可以再加埋大廳面積最少m2、T0單位不能佔整個住宅項目20％以上，廁所、廚房也要有齊各功能的法例要求等。咁樣，好多人會即刻問，D樓咪變到仲貴，市民點買呀？我話你知，呢個先係市民的出路，市民買唔起，地產商也賣不出，每個咁樣的單位，最少也要3~400呎，面積無得減，又要滿足到市民荷包，唯有減呎價，呎價減了，樓價自然回落，市民也住得舒服D。其他人亦會問，買左T0樓的，咪即時死？對，係好痛苦的，但唔通就因為咁，要令到一代一代的香港人越來越折墜嗎？假若政府推出此方法，必定受到地產界、買左樓既鬧到出彩，隨時整個樓市爆破，但放呢個炸彈的，不是政府，因為可以控制市場價格的，已經係大到政府不敢得罪的地產商了，他們話你值就值，不值就不值。所以樓市泡沫爆破，唔好怪政府！政府也不必擔心地會無人買，香港地產商不買，國內的也會買，他們不是錢多，而係收到阿爺的命令，要拿番個話事權ja。

美國總統大選後

如一個月前所說，DT勝出，好多事後孔明的走哂出黎，又呢個原因那個原因，估到就唔好咁遲講啦！或者可以講下，點解民調會差咁遠，除了選舉人票輸，連人數都輸埋，理由係DT講得對，Hilary一方操縱傳媒。DT鬧記者鬧報章，報導當然一面倒向Hilary，傳到你耳邊的消息，都不知過了幾多層，你看看DT勝出和H勝出的州份，整個西岸和New York附近H都贏哂，呢D都係大城市大媒體的所在地，相反中部較落後的地區，哪有傳媒會走去問？另一個更明顯的數據，就係8號的牛熊分布，22000以上的牛多到極點，怎能放過呢？

DT俾人感覺好癲，其實也不是，我估計港股經此調整，會繼續牛落去，今個月仲有深港通，可以牛到2017吧！仿間正流傳佢上任後，會維持量化寬鬆，不加息，反而我覺得12月加息機會大增，甚至乾脆把耶倫炒掉，換過鷹派的，使加息加得更快！美元強勢，誰人能阻！

買股票論

經歷過股災，股市谷底番彈，由充滿信心，到輸到心灰意冷，再由唔敢買，到買少少，呢個過程，我終於經歷了。得出一個不會輸的結論，就是只有買到最低價的股票，才有機會不敗～當然也不能說為贏，只是不敗而已。我自問，今年估過幾次，油價中左，$26油係底部，可惜沒有買到883，唔係無買，係又賣了，以為自己可以在$6.7買到，結果高升了又唔想買，第二次係952，睇住$0.5係底，但就是不敢買，第三次係992，$4.7買，$4.5想買又唔夠膽，最終在$5.33賣哂，第四次係547，仍然持有至今，希望無睇錯我對VR的期望......我的價係暫時最低的！

講講547數字王國，由破產走到今時今日，真的不容易！他最吸引人之處，係他的內容，只要你戴上一個眼鏡，就能去到另一個境界，而呢個技術，全世界都沒幾間，希望547不會令我失望！

中國－香港－澳門 樓市爆破論

在下個月開始至2017年上半年，我斷言，樓市爆破的機會率非常高，而今次，就唔係好似上年咁，跌左半年就升過了。最簡單的道理就是，連你阿爺的血汗錢，個層樓，都攞哂出黎比個仔或個孫買樓了，仲要話埋比你聽，你層樓破哂頂，仲有排聲，新盤一買就賺了。仲要拿哂全副身家去買T0，呢D樓邊有價值的，吹俾你聽當然物超所值啦。當市場上無哂購買力，香港政府再加大供應量，人民幣不斷貶值，國內開始無水，澳門經濟繼續L型發展，萬一特朗普上場，美國大幅加息，呢三地的樓價再無任何剛性需要的理由了。

想賣樓的，就快賣了，低2~3個價位賣也不緊要！

美國總統大選

兩個都唔係好人選，兩個都太老，希拉平庸，特朗瘋狂。特朗普很多壞消息，民調輸哂，負面新聞極多。不過，特朗普先係會贏的一個！你認為佢唔正常，但覺得佢好正的，為數也不少，負面新聞講的，都係美國的現實情況，至於女人問題，我想不止有錢佬會玩女人，窮人都會，而貪錢的女人，亦大有人在，只係大部分的女人無咁既機會。所以，以呢d就話佢輸梗，實在太兒戲！反而，過左10年，想美國變下的，佔了大多數，大家都厭悶耶倫不斷講加息，大家都睇恐怖主義唔順眼，大家都想有人對付民主共和兩黨，為左d小事係度日煩夜煩，另外，唔係話歧視，口話唔歧ja，特朗普對新移民的歧視，事實是好多人的心裡話！反而希拉利，你估佢做到什麼？你想現在的情況維持多5年就選佢啦！

假若特朗普當選，之前得罪佢既，真係大獲了，而道指我想真的會來個股災，跟住加息之快，應該無人會估到，人民幣一直貶值，國人係咁買港元，香港想唔追住加息都難，樓市你說現在瘋狂嗎？你話樓市會冧，阿婆都識答你，現在係剛性需要，可見將來都唔加息，樓價好合理，將來實仲貴，咁即係賺梗啦！現在人人都話李嘉誠計錯數，咁快睇淡香港樓市，但咁多年，香港邊個叻得過佢！

9月不樂觀

雖然黎緊會大牛，但無大戶會係現水平咁中入去。已經連升兩個月，難道單靠深港通，就可一直升嗎？深港通係好的，但以便宜價錢買入股份再炒爆深港通會更好。小心星期一和二，到星期五你會清楚了。恆指呢排升極都俾23000頂住，絕對唔似等埋你上車再爆上格局。

大牛市 ／ 大熊市

近半年，耳邊不停聽到"股災又黎...股災異象...索羅斯等世界大惡準備終極沽空"，但股市卻由18200一直升到現在，身邊個個都唔夠膽入市，通常都係玩兩手，呢D咪就係大淡友造緊野。一路嚇你，一路調哂D先鋒黎佈局買貨，個市chok兩chok，散戶手上的貨就又平又賤咁去哂大淡友手上，散戶只能驚驚青青咁，仲唸緊係咪又有股災。講真，股災又點會咁清楚話俾你知！

當大淡友集齊貨後，就會話你知這個其實係大牛市！到時候，升到你我都唔信，不過，我相信股災係會黎的，係兩年後，即2018。同我早幾個月所講的一樣，今年會係升，現在我預測，2017會再升，甚至升到爆！而點解會爆，我相信呢排講的問題全部都會中！包括歐元、歐豬、脫歐、人民幣貶值、中國經濟泡沫、美國經濟衰退、美國加息、新興市場、負利率，有咩壞消息都會爆哂，更何況，呢D係應該爆的。

民主選舉

最近市場好悶，但悶下悶下連22000都升穿了，淡友無力，好友出多少少力。升都呢個水平，大家都安定D，甚至外界更指係牛市一期的現象，叫大家入定貨，捱過牛市一期就好了。雖然市況較穩定，但絕不是好平？唔平就唔買，呢個係我的定律。

今期最興的，就莫過於AR，假若今年係升，我相信AR股票會繼續有得炒。

美國總統大選，無論係民主定共和黨，兩個都幫唔落，希拉利一出黎已是嫲嫲Feel，連用咩email account都攪到一鑊泡，個種感覺，就好似董伯伯咁，做親善大使、攪團結一定無問題，但要領導一個區域，就係兩回事，雖然，現在比較番，佢係3個之中最好的。而且，希拉利仲遇到個咁既對手，咩「Xy#@5^&」招都出，真係你信佢一成，輸足你9成。特朗普做的話，大美國番哂黎，但只係美國有錢白人，黑人、窮人應該無運行，你真係信佢會幫你還房貸？

民主選舉，係好事，我都希望我的國家、城市行呢套，但當各個後選人都唔係好鍾意時，咁就麻煩了。所以，民主選舉也有其問題，但這個問題就好易解決，只要不限現任總統的任期就可以了。點解？政治人才，係全世界都缺乏，一個好的總統，明明做得好，但受任期所限，連任一次就要落台，對整個國家毫無得益。一個偉大的總統，他考慮的事情一定不止10年，可能係15、20甚至更長久的發展，貫徹執行才能有好的發展，新加坡前李總統就是一個好例子。雖然有人會說，咁咪比佢玩哂，事實係的，俾個好的玩哂，都好過比衰的玩謝，你睇現任個個就知啦！選左個唔好既，5年就拉佢落黎啦，能自由選舉連任咁多年，唔好都唔會選佢啦！

英國脫歐 歐盟解體

英國歷史性脫歐，恆指曾跌1200點，是否如各界所料，下星期一就無事？未必了，英國脫，其他國家也會仿效，但市場上仍一面倒沒有說出壞方面的消息，只說好快沒事！我相信，英國脫歐，會是歐盟解體的序幕。

留意匯豐，匯豐都暴跌，就是熊市結束的特徵。

匯豐控股

英國脫歐危機，引發匯控不斷尋底，以低價買入長揸匯豐的機會來了！目標價$40

今年股市

人們都準備好買熊證，我相信今年會係牛。而且6月會很牛！當然，什麼時候看牛或熊也很重要。

為何中六合彩一定要買樓？

今日睇到新聞報道，訪問一些人：你中左奬第一樣嘢會做嘅係咩？買樓啦！點解成個城市，大部份人中咗六合彩，第一樣要買嘅係買樓呢？可以買車、買快樂、買玩具、買夢想。如果成個城市啲人掛住買樓，一生人買樓供樓，咁咪好可悲！人應該有夢想，佢想做生意嘅，其實可以用錢搵錢；想要穩定的，放喺銀行做定期，都幾穩定，咁大筆數收少許息都夠支出。買樓可以升值呢個概念，其實我唔係好認同！呢個社會因為經濟起飛、人口膨脹，所以股市樓市都會隨着社會嘅發展而不斷升值，睇返而家嘅社會無論係人口都不斷老化，可以發展的項目都已到盡頭，人的收入已去到一個瓶頸位，很難再上，所以仍不斷期待股市、樓市可以再升值幾倍，是不切實際的！這個就是已發展國家和發展中國家的價值分別！

澳門賭收

近期澳門3，4月的賭收連續兩個月回落，我預期賭收好大機會跌破政府所預期的下限，即跌穿每月170億。今年至2017年更有機會見每月100～120億。相信澳門概念的人會跌到怕，股樓更會被「打回原形」，要坐貨的人要很有耐性。

油價見底

油價在$26-27見底，但恆指似乎仍未跌夠，暫時估計會到16000點。坊間一直說股災與油價有關，但看來由現在開始，又有新的焦點了，最後的大佬應該就出來。883在$6.41買不到，繼續等待，下次883再跌，應該與油價無關了。